Efnisyfirlit

Fyrsta mjólkin Fyrstu dagarnir Ef gefa þarf ábót  Fyrsta mjólkunin

Fyrsta mjólkin

Broddur er fyrsta mjólkin sem kemur í brjóstin oft nefndur fyrsta bólusetningin. Broddurinn á ávallt að vera fyrsta næringin sem barnið fær en hann er talinn forrita barnið fyrir lífstíð. Mæður fullburða barna geta upplifað það að barnið vilji vera á brjósti dag og nætur fyrst til að byrja með. Magi nýbura er mjög smár og þess vegna þarf að fylla á hann oft fyrstu dagana. Þegar brjóstin bólgna vegna stálma getur verið erfitt fyrir barnið að grípa brjóstið og sjúga til sín broddmjólkina.  Barn drekkur um það bil 1-3 teskeiðar í gjöf (5-15 ml).

Fyrsta brjóstagjöfin

Ekki ná öll börn að mjólka til sín broddinn og í þeim tilfellum þarf að nálgast hann með handmjólkun og/eða mjaltavél (tvöfaltsett). Fullburða börnum má gefa broddinn með skeið, en annar háttur er hafður á ef um er að ræða fyrirbura eða veik börn. Broddinn þarf að gefa í réttri röð því er hentugast að nota önnur ílát undir hann en pela og merkja sérstaklega með númeraröð. Þrátt fyrir að broddur hafi verið frystur á ávallt að nota hann sem fyrstu næringu. Það ætti aldrei að blanda í hann þurrmjólk né bætiefnabæta hann. Ef móðir getur ekki gefið brjóst eða mjólkað sig vegna veikinda, þá þarf ljósmóðir að mjólka hana svo hægt sé að ná í þessa mikilvægu næringu sem broddurinn er og það þarf að gerast eins fljótt og mögulegt er eftir fæðingu.

Fyrstu dagarnir

Fyrstu 14 dagarnir eru mikilvægastir sérstaklega á það við um fyrirbura en á þessum tíma verður til bakteríuflóra í meltingarvegi. Ef fyrirburi fær tilbúna ungbarnablöndu margfaldast líkur á að hann þrói með sér þarmadrepsbólgu. Á fyrstu 3 dögunum verða til prolaktín viðtakar í brjóstum móður og ef þeir eru ekki virkjaðir í fulla virkni strax í upphafi verður mun erfiðara að koma mjólkurmyndun vel af stað.

Þarf ábót

Ef þarf að gefa ábót þarf hún helst að vera í formi brjóstamjólkur svo ekki sé hætta á því að óæskilegar bakteríur í meltingarvegi nái yfirhöndinni og valdi veikindum hjá barni en slíkt getur í sumum tilfellum reynst barninu lífshættulegt sérstaklega á það við um mjög mikla fyrirbura. Sjá nánar um ábótagjöf brjóstabarna.

Fyrsta mjólkunin

Það er mikilvægt að fyrirburamóðir handmjólki fram brodd fyrstu 3 dagana 5x á dag eftir gjöf samhliða því fari hún í mjaltavél og noti tvöfalt sett (mjólki bæði brjóstin í einu). Þannig virkjar hún mestu möguleika sína til hámarks mjólkurframleiðslu til lengri tíma. Einnig er mikilvægt að mæður sem eignast börn sem ekki hafa fulla getu til að næra sig vegna vanþroska eða aflögunar á höfði mjólki fram brodd og gefi barninu eftir gjafir svo börnin fái síður gulu. Tekið saman af Arnheiður Sigurðardóttir uppfært í nóv. 2010.

Heimild

Meier PP, Engstrom JL. (2007). Evidence-based practices to promote exclusive fedding of human milk in very low-birthweight infants. NeoReviews. 8(11); e467 Accessed 4/15/2009.

Meier, PP. Engstrom, JL. Patel, AL. Jegier, Bj. Bruns, NE. Improving the use of human milk durning and after the NICY stay. Seminars in Perinatology, in press.

Morton, J. (2009). Is use of breast pump out of hand? Mothers who use hand-on technique see increase in Milk production. American Academy of Pediatrics. 30(6), 14.

Parel, AL. Meier, PP. Engstrom, JL.(2007). The evidence for use of human milk in very low-birthweight preterm infants. NeoPeviews. 8(11);e459 Accessed 4/15/2009.

Thomas, E. C., Williams, T. M. og Hartmann, P. E. (2010) Stem Cells in Human Breastmilk: Exploring the Potential of a New Discovery. Í Riccardo Davanzo (ritsj.). Nutrition With Human Milk. Italy. Medela.

West, D. og Marasco, L. (2009) The Breastfeeding Mother´s Guide to Making More Milk. United Staes of Americaa. Mc Graw Hil.

Háskólinn í Reykjavík, Reykjavík University 2010.