Brjóstagjöf er eðlileg leið nýburans til að næra sig. Barn fætt eftir lyfjalausa fæðingu ætti að vera fært um að skríða upp að brjóstinu þefa upp leiðina þar sem sama lyktin er af legvatninu sem barnið hefur legið í og geirvörtunni. Finna geirvörtuna og taka brjóstið og sjúga það rétt (Ransjo-Arvidson og félagar, 2001).
En stundum gengur þetta ekki svo auðveldlega fyrir sig. Best er að fæðingin sé lyfjalaus þannig að barnið sé ekki undir áhrifum lyfja þegar það reynir að taka brjóst í fyrsta sinni. En því miður er staðreyndin sú að mörg börn reyna í fyrsta sinn að taka brjóst undir áhrifum deyfilyfja. Það er mjög áhugavert að skoða rannsóknir Suzanne Colson hvernig börnum er eiginlegt að fara á brjóst og hvernig innra eðli móður kemur fram er hún fæðir barn og saman hefja barn og móðir brjóstagjöf. Sem er löngu innbyggð í eðli þeirra í gegnum aldirnar og kemur fram við svo náttúrulega athöfn eins og að eiga barn. Sjá nánar hér.
Það er ágætt myndband á Youtube þar sem hægt er að sjá muninn á hegðun barna við brjóstagjöf hvort barnið er undir áhrifum lyfja eða ekki. Einnig geta erfiðleikarnir orðið meiri við brjóstagjöfina ef móðir og barn eru aðskilin.
Ef barn nær ekki að næra sig við brjóstið á árangursríkan hátt er það skýrt merki um að eitthvað sé að og það verður að skoða. Minniháttar líkamlegur galli eins og tunguhaft getur haft mikil áhrif á brjóstagjöfina og lítil aðgerð að klippa á tunguhaftið veldur því að barnið getur nært sig. Ef börn geta ekki nært sig þrátt fyrir að hafa verið aðstoðuð verður að gera nákvæmari líkamlega skoðun þar sem miklar líkur eru á að eitthvað annað geti verið að sem hindri barnið í að ná tilætluðum árangri við brjóstagjöfina (Genna, 2008). Sum börn ná aldrei að næra sig við brjóstið en önnur geta lært það með tíð og tíma en á meðan þarf að leggja mikla áherslu á að móðir viðhaldi framleiðslu sinni og noti reglulega mjaltavél. Því brjóstamjólkin er sérstaklega mikilvæg fyrir þessi börn (West og Marasco, 2009). Hér má finna tengil á matslista hjá Royal women´s hospital í Ástralíu og sjá einnig nánar undir liðnum Börn í áhættuhóp ABC aðferðalýsing.
Heimild
Genna, W. C.og Sandor, L. (2008). Breastfeeding: Normal Sucking and Swallowing. Í C. W. Genna (ritstj.) Supporting Sucking Skills in Breastfeeding Infants (bls.1-41). Sudbury, Jones and Bartlett Publishers.
Ransjo-Arvidson, A. B., Matthiesen, A. S., Lilja, G., Nissen, E., Windstrom, A. M., og Uvnas-Moberg, K. (2001). Maternal analgesia during labor disturbs newbron behavoior. Effects on breastfeeding, temperature, and crying. Birth, 28(1), 5-12.
West, D. og Marasco, L. (2009). The breastfeeding Mother´s Guide to Making More Milk. Bandaríkin, McGraw Hill.
Tekið saman af Arnheiði Sigurðardóttur, 2010, uppfært mars, 2011.
